கோபச் செந்நிறமோ கண்ணம்மா! (1-10)

நிறோஷ் ஞானச்செல்வம்: 

கொல்லயில் தானோடி கண்ணம்மா - நீ

        கோபச் செந்நிறமோ

ஒல்லைக் கெதிர்ப்பதமோ கண்ணம்மா - நீ

        ஓதக்கடல் நுரையோ! 

                                            ***

விவேக்பாரதி: 

வில்லின் விசையடிநீ - கண்ணம்மா

        வீசும் விழிச்சுடரில்! 

ஒல்லைக் கெதிர்ப்பதந்தான் - காதலின்

        ஒற்றை மொழிசொலவோ? (1) 

நிறோஷ் ஞானச்செல்வம்: 

சொல்லும் மொழிகளிலே - கண்ணம்மா

        சொக்க வைத்திடுவாய்

எல்லை எங்குளதோ - உன்னுடைய

        இன்பப் பூஞ்சிரிப்பில் (2) 

விவேக்பாரதி: 

சிரிப்பில் புதியவளே - கண்ணம்மா

        சிக்கிமுக்கி இதழே

உரசல் நெருப்புதரும் - குளிரினில்

        உடலம் நடுங்குகிறேன்! (3) 

நிறோஷ் ஞானச்செல்வம்: 

நடையே ஒயிலாகும் - கண்ணம்மா

        நகையே எழிலாகும்

விடையே என்வாழ்வாம் - அஃதைநீ

        விள்ளுவ தெப்போது? (4) 

விவேக்பாரதி: 

எப்பொழுதுன் சிரிப்பு? - கண்ணம்மா

        எப்பொழுதுன் னணைப்பு? 

எப்பொழுதுந் தவிப்பு - முன்னம்வா

        ஏக்கத்தளை யறுத்து (5) 

நிறோஷ் ஞானச்செல்வம்: 

அறுக்கும் கவலைகளைக் - கண்ணம்மா

        அறுக்கத் தெரிந்தவளே

இறுக்கும் கைகளிலே - என்னையிங்கு

        இயக்கும் ஒருவிசையே! (6) 

விவேக்பாரதி: 

விசையின் விதியடிநீ - உன்னுள்ளே

        விதைத்த கணமடிநான்

அசைவும் அமைதியுமாய்க் - கண்ணம்மா

        ஆகி இயக்குகிறாய் (7) 

நிறோஷ் ஞானச்செல்வம்: 

இயக்கம் நீயலவோ - கண்ணம்மா

        இயங்கா மோனமும்நீ

தயக்கம் உடைத்தெறிந்து - என்னாவி

        தழுவித் தேற்றுகின்றாய்! (8) 

விவேக்பாரதி: 

இன்றாய் நாளையுமாய்க் - கண்ணம்மா

        இதயத்தின் நேற்றுமென

நின்றாய் நெஞ்சுக்குள்ளே - உன்னைப்போய்

        நேரில் தொடத்துடித்தேன் (9) 

நிறோஷ் ஞானச்செல்வம்: 

துடித்த தென்பிழையே - கண்ணம்மா

        தூலம் தாண்டிவிட்டாய்

வடித்த பாட்டினிமை - போலுயிர்த்து

        வந்தென் உட்புகுந்தாய்! (10) 

தொடரும்...